前幾日，又見到We Like HK 專頁搞左個名為「努力有明天」一人一個勵志故事活動，可惜知得太遲，早知既話就會提名匡信/盈柏診所入面我欣賞既人參加啦。
忽發奇想，我又唔識好似佢地咁拍片講故事，唯有寫一個我想寫既勵志故事出黎啦。係真實得好貼地的勵志故事黎架。
係匡信/盈柏呢兩間中醫診所，我知道有兩位沈姑娘（其實正確黎講佢地係診所助理，負責協助中醫診所的日常運作､協助中醫師､掛號､執藥､處理街坊病友查詢､清潔診所之類既工作啦）。呢兩位沈姑娘就係呢個故事的主角。
＃晴朗診所的沈姑娘（晴朗沈姑娘）
晴朗沈姑娘，本身有家庭，有小朋友。係做診所助理之前，因為本身學歷較低，不熟識電腦操作，係香港呢個咁現實既社會，只能做比較低下階層既工作。一個緣份，就在樂富診所開始在星期日提供應診服務既時候，有幸於樂富診所做兼職，邊做邊學，學做診所的日常工作､學電腦操作､學打字､學執藥... 做左星期日兼職診所助理。
隨著匡信中醫專科診所的發展，呢位晴朗沈姑娘把握住一個轉職的機會，轉到新蒲崗診所成為一個真正的全職診所助理。現時已調職在晴朗診所服務。
在求診者的角度，我眼中的晴朗沈姑娘，係一個好刻苦耐勞的人，對待街坊病友好有禮貌，好上進，好勤力，效率很高。診所的工作很繁忙，但從沒聽過佢有半句怨言。
以我所知晴朗診所的助理上班時間分兩更，一更收18:30，另一更收20:00。診所是晚上七點半休診的。而醫師的開診時間就各有不同。晴朗沈姑娘會因應需要，有時會早一點返診所打點準備開診，有時亦因為有病人未完成治療而唔介意晚一點收工。
我曾經見過，在診所午飯休息時間，有老人家在門外等，晴朗沈姑娘見到，開門讓老人家先入診所坐一下，向老人家解釋未到開診時間，請老人家先坐一會，等醫師午飯後回來應診。又見過佢對有些講極唔明既老人家好有耐性，慢慢同佢地解釋。
見過好多次，晚上差唔多七點，有病人遲到，其實係因放工塞車，趕到喘晒氣咁返黎要針灸治療，或過七點要求睇內科，晴朗沈姑娘問過醫師無乜特別事又唔趕時間可以收症佢都會收。最令我印像深刻的一次，時間已經差唔多八點，晴朗沈姑娘只等最後一個病人完成治療交費後，整理好治療室同診症室佢就可以收工，診所門口亦已掛上了「休診」牌。突然有街坊走入趁所向晴朗診所沈姑娘講「你仲係度真係好啦，我想幫屋企人配藥，原來佢咁啱到今晚無藥食。唔好意思，你已清潔好準備收工，令你麻煩了。」晴朗沈姑娘很有禮貌回答「唔緊要，你話我知病人名，配幾多日，執好藥再清洗過用具很簡單，不麻煩的。」那一刻我很感動，之後找機會問過晴朗診所沈姑娘，你唔係趕住收工返屋企煮飯比小朋友食架咩，咁都肯幫病人配藥既？出面d診所，中醫又好，西醫又好，好多姑娘都想早d收工，係醫生唔知既情況下趕病人走唔比人睇醫生架啦，無人睇醫生無野做咪你可以早d 收工囉。晴朗沈姑娘話唔可以咁樣架，佢老細出糧比佢，佢就梗係要比心機做野架啦，診所就係比病人睇醫生既地方架嘛；將心比己，病人有病要睇醫生已經好慘，醫師幫到佢地會醫好佢地，姑娘點會忍心唔比人睇醫生咁衰架。而且遲左收工，公司都會計番OT 的，又唔係長期係咁。聽到佢咁講果刻我真係好感動架！基本服務性行業員工應有既態度，唔係人人做到架！
晴朗沈姑娘唔止將診所打理得井井有條，在任全職診所助理期間，還自我增值，用自己的工餘時間自費進修了為期三年的兼讀制中藥文憑課程，實習同考試都係自己請假的。其實佢公司又無要求佢讀書，診所助理呢行又無話讀左個文憑會特別吃香特別巴閉，咁辛苦讀黎做乜？晴朗沈姑娘話，學海無涯呀，年青時沒機會，而家補番啦，係中醫診所做，其中一樣工作係執藥嘛，學多點中藥知識唔係好好咩？將來會點發展沒人知，但書讀左係自己既，今日所學到既知識，全部都係自己既，自己一樣有所得著架啫。
哇～真係一個好好姑娘黎架！
＃樂富診所的沈姑娘（樂富沈姑娘）
樂富沈姑娘，聽講好早期就已經係樂富診所的任職全職診所助理，又係有禮貌有高效率的姑娘。對診所運作好熟悉，一樣係好有愛心的。樂富沈一樣唔會因為心急放工返屋企照顧小朋友而hea 做，對病人都有禮貌又好好架。佢又係話老細出糧比佢，收得份糧梗係要勤力d 做野架啦。印像最深刻既一次，夜晚黎既，診所只剩下兩三個病人等攞藥，有一個婆婆行入診所，同樂富沈姑娘講佢係商場跌倒，對腳好痛，自己打電話call 白車，問可唔可以比佢坐係診所等送醫院。婆婆好硬頸，話唔洗屋企人陪。婆婆腳上有輕微擦損，樂富沈姑娘幫婆婆做簡單的傷口處理，再氹婆婆，幫婆婆打電話通知婆婆屋企人。呢d 咪就係屋邨診所有守望相助既人情味囉。
樂富沈姑娘一樣邊做邊自我增值，用工餘時間自費完成了三年的中藥文憑課程。同樣地覺得張文憑表面看似無乜用，但實際學到既知識都係自己的。嗱！呢d咪敬業樂業既精神囉！
除了診所助理工作外，佢公司給了她轉職機會，讓她嘗試文職工作。樂富沈姑娘感謝公司給她嘗試另一工種的機會，原來自己都可以做得到架。現時 ，樂富沈姑娘已經無係樂富診所任職架啦，聽講間中有需要時都會返診所幫手的。
不過咁，呢兩間診所都有其他優質的診所助理的。就好似樂富診所的鍾姑娘及梁姑娘，都係有禮貌又高較率又有上進心既姑娘黎架！人多時都應付到，就好似開左turbo 咁，好勁架！
匡信/盈柏呢兩間診所真係好好，佢地有自己的培瞓制度，見過有d 兼職診所助理，無經驗想轉行的會請，有d就因為湊小朋友好耐無出社會工作都會請，給予一個重新投入社會既機會。當然，佢地個創辦人好好人，但同時都係堅持要有良好服務質素既人黎架，好有要求架。所以，做得唔好給予機會改正之後都係做唔好既一樣無得留低架。
呢兩間診所唔止有病友醫病的故事，又有診所助理的勵志故事。就好似以前有老細成日同我講「機會係留比有準備既人，當有機會既時候都要好好把握先得架。」
呢個唔係招聘廣告，都唔係介紹診所姑娘既廣告，只係有感而發寫下d 勵志故事，表揚下d好姑娘，互相鼓勵下咁啫（順便鼓勵埋成日遇到挫折既自己吖嘛）。嗯... 故事寫完，我又要繼續努力工作啦！
